الأربعاء، 29 مايو، 2013

يا خطوتك ......... للشاعر / محمد على



يا خطوِتَك شانقه الطريق
سايقه النجاه

مليون حياه
فدادين دُعا فى عيون بريىء
والخوف بقى مذهب يحاسب 
فِ المذاهب لاربعه
وانا وانتى فصل من الفصول الشقيانين
كان الحنين هو الكتاب
وسنين عذاب
متمدده جوه الوريد
سادّه عيون الشمس دمع من المطر
لما القدر
مابعتش غير المستحيل
مشوار طويل
والليل عِشق فيّا انكسار
مابين نهار المشتاقين
وبين ذنوب الأجوبه المفتوحه بينّا 
آه يا حبيبتى
 ياللى لقانا فى الزمن كان أحلى جنّه
وبغرامنا شعللت نار المجوس
خبى النفوس الزّارعه غِل ف كل شارع
مليون حكايه بتبتدى بِسِــــــفر المواجع
ويفر طير الذكريات 
لما الآهات ما تلقى صدر تبات تعشش جوّه ضِلُّه 
الحب كلُّه باهديهولِك
وكفايه نورِك كان صديق
يا خطوِتَك شانقه الطريق

ليست هناك تعليقات:

إرسال تعليق