الشعب المصرى >>>>> عبيرالرملى

الشعب المصرى فى عز الازمات والاحزان يغزل ويروى النكت والافشات ويكتب قصص وحكايات ويسخر من الظلم ويغنى بصوت

عالى انا حر ويقف امام الغزو والقهر ويطالب بحقوقه لو ضحى بروحه صاحب قضيه

الشعب المصرى فى عز الحزن بيدمع ودموعه مش معناها ضعفه وفى عز الفرح بيدمع ودموعه بتعزز فرحه ولم يضحك يقول اللهم اجعله خير وكان الفرحه مش مكتوبه لينا.

الشعب المصرى ده حكايه لم يفكر ولا يدبر بيعرف اذاى يحقق وينفذ حلمه ولا يهمه اصل شعب مقدام

الشعب المصرى همومه بتوقيه وتثبت اقدامه وقلبه بيقوى فى اللمه ويبقى قوه وابطالنا كلها بتقول الشعب المصرى ده حكايه بيرويها التاريخ لينا فى مواقفنا فى حروبنا فى ليالى الانس والمغنى فى كل مجال تلاقينا .

الشعب المصرى قلبه كبير وحنين وطيبه قلبه غلباه لو شاف فى يوم فيلم يتشد ليه ويتمنا المجرم يلقى مصيرسئ والشرطه تقاضيه ، ولو شاف المجرم فى اخر الفيلم بيدمع يصعب عليه ويتمنا لو يقدر المجرم يهرب ويفلت تقول عليه عبيط تقول عليه طيب .

الشعب المصرى هو اللى عزم القطار فى الاساطير وكتب على الجدران حكاوي الشعب المصريه وقصص فرعونيه

هو اللى كان ومازل نسيج واحد مينا ومرقص ومحمد كلنا فى طبق واحد ولقمه هنيه تكفى من الحبايب ميه دى بردوا نظريه

امال هو ليه مستهدف وليه الكل بيحسد الشعب المصرى على طيبته على وحدته وهبته يمكن الظروف تحكم بس الاخوات بيتعركوا ويتحسبوا لكن فى الاخر اخوات

قلوبهم على  قلوب بعض  بيكملوا ويقوى بعض وبيشربوا من مياه واحده وتضمهم ارض وحده وهتفضل تجمعهم الوحده وقلوبهم الطيبه تلم الشمل مهما حاول الاعداء.

الشعب المصرى فى وقت الشده يتجمع يساند بعضه ويفدى بحياته اهله ويخرج المارد ليتصدى لاى دخيل على ارضه

الشعب المصرى فى الازمات قلب واحد بيجمعه الحب والتاريخ والجينات ،جينات مصريه جدعنه ابن البلد وبنت البلد يمكن يكون تراب الحاجه والزمن غطتها لكن بتظهر وقت الشده وتتجلى .

بس ياخساره دخلت علينا عادات كسرت همم الرجال وامال البنات وقوه الستات تكنولوجيا المعلوما ت

الشعب المصرى لو اعتلى عرش السلطه والكرسى بيتكبر ويتجبر ويدوس على ناسه وينكل باحبابه وحراسه والمحسوبيه تبقى طريقه ونمراسه وسياسته تبقى الفرقه ليسود والمصلحه تفرض قلعها لو يموت ماكنش كدا المصرى .

الشعب المصرى امام الدش متجمع واما م النت طول الليل بيدور وبيشيت ويتحاور ويتخانق ويتعرف ويصحى الصبح مش شايف ويروح الشغل مش عارف هيعمل ايه ويكمل باقى النوم فى المكتب

فى الموبايل طول النهار يتكلم بيحب ويحكى ولايتعلم يضيع نص العمرفى النوم والنص التانى على الموبايل بيتكلم

يحكى ويتخانق فى الاتوبيس اشى سياسه واشى اقتصاد ويركب الاتوبيس على السلم وفى طابور العيش بيتبهدل ويتعور وطابور السولار ويستنا ويتعذب طول النهار ويصرخ بصوت عالى نفسى اتعامل كانسان لكن راضى بقسمته وبيقول يارب الستر والامان واللمه .

الشعب المصرى فى الاشاره بيتالم وناس بتولد وناس بتموت وناس بتزهق وتركن وناس بتفوت وناس بتشتم وتسب وتلعن ابو الحكومه بس الحياه ماشيه بعذبها وحلوها وبالمها وهمها.

الشعب المصرى بيتجوز تحت اى ظروف بيرضا بقسمته فى حجره فى فيلا فى قصر بزفه فى  الميدان بزفه على حصان بشهر عسل فى محرم او فى لبنان.

الشعب المصرى بس اللى مع كل الظروف بيعيش ويستسلم بس صدقنى لم بيثور بيخلى العالم يتعلم بيخلى الناس تتكلم .

 بس امتى نحس اننا شعب فيه خير وقوه تبنى ذى ما بتهدم امتى ندور على احلى ما فينا ونخرج خير اراضينا ليه دئما بنهرب ونغرق فى بحور الهجره على بلاد طمعانا فينا وندوس كرامتنا بايدنا.

ليه دئما حكمنا بيرخصوا فينا ليه وتاريخنا وعزتنا بين البلاد بنهاها اجددنا وبيهدمها اهلينا ليه ؟

الشعب المصرى طيب وبيحب اللى يصون الوعود ويساند صاحب العزه والكرامه ويهلل لكل زعيم بيبنى ويسمع لشكاوينا الشعب المصرى عايز زعيم يصون العهد ويكون ايده بايدينا .