الخميس، 9 مايو، 2013

سلملى على اسكندريه وبحرها





عبيرالرملى

سلملى على اسكندريه وكل ركن فيها  انا عارفه انك جنب البحر سلملى عليه وتبقى اساله عنى انا ياما قعدت معاه واشتكيت من
الايام وبكيت من الظروف وكنت احكى له كل شئ كان حضن حنين وكان يصون السر يسمع ولا يتكلم يفهم ويصبرنى ويمسح دموعى ويصون ودى ويخاف على
ياما رميت فى بير مسعود امنيات وكنت اصحى من بدرى ساعه الشروق عشان اشوف الشمس وهى بتشرق وكنت احب اشوف ساعه الغسق لحظه ما يحضن البحر القمر واسهر عشان اشوف القمر فى حضن السماء فوق البحر يونسه بنوره.


سلملى على البحر... قوله عبير بتسلم عليك شوف هيقولك ايه  كنت الصبح افرح فى حضن امواجه واسبح واجرى والعب على رمله واعمل بيوت وتيجى الموجه تلعب معايا وتهدها وارجع ابنيها وتيجى تغرقها وتشد الرمله لحضنها ............البحر شافنى وانا فرحانه حس بفرحتى وشاركنى طفولتى وخوفى من ميتة وصراخى وهو بابا بيعلمنى السباحه ويرمينى ادبش واخربشه البحر كان معايا فى طفولتى وشبابى

                      وقلبى بيدق قعدت على رملته وحكيتله عن حبيبى وعن غربتى البحر صديق وفى

بس تعرف اقولك سر رغم الغرام والحب وعشقى لامواج البحر وصوته وهواه اللى كان بيسطلنى وانسا الدنيا ومشاكلى معاه  كنت  ساعات اشعر بالخوف باليل وانا قاعده على شطه والبحر مظلم  لا ارى سوى ضوء القمر واصوات الامواج واصوات بعيده من على الكورنيش كنت اشعر بانى فى فك وحش قد يغدر بى ويتملكنى الخوف واركض الى زحمه البشر واشعر ان عينى لا ترى من شده الضوء انوار كتير واصوات وضجيج ناس وزحمه وسيارات تركض وموسيقى ....... واجد نفسى لا استطيع ان اسمع او ارى لفتره طويلة اخرج منها من عالم البحر الى عالم البشر.......فى كثير من الاحيان كنت لا اتحملها واعود الى حضن البحر والسماء وضوء القمر وقد تبدد خوفى اشعر فى هذه اللحظه ان الخوف كان وهم وحضن الحبيب هو الامان  

واشعر بالذنب كيف اخاف من امواج البحر وظلمته وهو من سمع منى وصان ودى وحفظ سرى واجد ان حضن البحر اوفى من حضن البشر وسكونه احن من الاسفلت والزحمه والصخب

مع البحر اشعر براحه الفؤاد والقلب يرقص فرحا وحزنا ولا يشعر به احد البحر يااااااااااااا بس قوله عبير بتسلم عليك كل شبر وشط فيكى يا اسكندريه له ذكريات ومشاعر واحساس وتاريخ جمعتنا ايام طويله وفرقتنا الظروف لكن فى قلبى باقى

لكن غرامى بشواطئك وحبى لبحرك وغرامى بيكى وعشقى ليكى لا ينتهى انتى فى وجدانى تسكنى وذكرياتى تذكرنى بايام اتمنى ان تعود وطفوله لا اجدها الا على شطك وفى حضن بحرك وسماكى

اوعى تنسا سلملى على البحر كتير والقلعه كنت بركب فيها الحصان واتفرج على متحفها واشترى الايس كريم واشعر بهواها يداعب شعرى وملابسى ومحرم بيك والزنقه والمرسى ابو العباس ومحطه الرمل والسينما هناك .......والمنتزه بحدائقها يااااااااااا يا ما لعبت  فيها لى صور فى كل ركن ........والمعموره وبحرها وشلاهاتها واهلها ......والملاهى ياااااااااااا ذكريات......وسوق السمك ومكتبه الاسكندريه والانفوشى .......وشارع خالد ابن الوليد ياما كنت انزل اشترى منه دباديب ولعب واكسسوارات وايس كريم واتعشى على الكورنيش وعربيات الترمس والسودانى

                      سلم لى على البحر على كل ركن عندك واساله عنى هيقولك انى بحبك 

هناك تعليقان (2):

  1. ررررررررررررررررررائع جميله والبحر واسكندريه كله بتحبك كتير كلامك جميل خارج من فلب صدوق انت مواليد اسكندريه

    ردحذف
  2. ربنا يخليك لا ماما اللى مواليد اسكندريه بس مش اسكندرانيه كان جدى بيشتغل هناك وقتهابس انا بعشق اسكندريه

    ردحذف