من ديوان طعم الأيام ......وحشانا يامصر

 

 

 

من ديوان طعم الأيام
وحشانا يامصر
---------------------
وحشانا
بسمه صافيه تطفى نار قلب الحزين
وحشانا
كلمه حلوه تروى أشجار الحنين
إتواعدنا يكون ميلادنا شمس طله وفرحه هله

إتواعدنا نجيب فى إيدنا حلم بكره ف لحظه وللا
كله اتغير ليه وازاى ** إتحديت الحلم الجاى
كان نفسنا نتعلق بيه ** نفتح صفحه جديده عليه
مين يصدق إن بكره اللى احنا عشناه من سنين
كان فى ورقه ف غصن شجره كان بيرويها الحنين
جت رياح البعد شالت من جذوره الدبلانين
الطريق اللى يدله يروى عطشه طب منين
واما شقت أرضه صرخت طب يعيش إزاى وفين
---
ياربيع العمر إمته يزهر الورد الجميل
والبساتين اللى مالت إمته يوصلها الدليل
والقناديل اللى طفت اللى دابت م الرحيل
والعناكب جت ونسجت الحقيقه شىء طويل
---
تحت الرمال بروى السنابل يمكن فى يوم تقدر تعيش
إحساس مشاعر قابل ورافض إنى اكون هامش ماليش
إنى ابوح بالحب ليها إنى اكون طائر بريش
خايف يكون ده حلم واصحى على حقيقه ماترضنيش
كله اتغير ليه والزاى ** اتحديت الحلم الجاى
كان نفسنا نتعلق بيه ** نفتح صفحه جديده عليه
عبد الناصر رجب كامل