الجمعة، 15 مايو 2015

الحلقة التانية من " يـــــــوميات مــــوظف ."......... عبيرالرملى



صحيت من النوم على صوت بابا بيقول ل امى روحى صحى الواد ده افهم منة عمل ايه
فى الشغل وعشان يأكل هو مقضيها علطول نوم

جت امى تصحينى قولتلها انا صحيت اهو هو ده بيت يتنام فية دوشه وقلق وقالتلى روح اغسل وشك وفوق عشان احضرلك الاكل وتكلم ابوك عايزك

قمت اخد دش وقطعت الكهرباء والصابون على وشى وجسمى وقعدت انادى واغنى ظلموه فى الحمام والدتى قالتلى الماتور فصل لان الكهرباء قطعت يعنى مية ونور يا جمالوا ااااا هتصرف واشوفلك كم زجاجه من الثلاجة

يا نهارى ثلاجة امرى لله اخدت زجاجات المية وشربت واخدت دش وخرجت بدعى على الحكومة وبتوع الكهرباء والمية والبلد كلها

والدتى حضرت الاكل قعدت اكل على ضوء الشموع ههههه لقيت الغداء كشرى قولتلها حرام عليكى يا امى يعنى مدام عنيات فى الشغل وانتى فى البيت وبتوع النور والمية اتقوا الله فية شويه فى اختراع اسمه لحمة وحاجه اسمها فراخ وحمام وكدا يعنى طب شوربه ...  قالتلى مش عجبك انت عارف العدس والارز بقى بكام ....  تبقى تجيب انتى بقى المحمر والمشمر هو المعاش بتاع ابوك فية قد ايه عشان اسد عليكم لحمه وفراخ والكلام اللى بتقوله ده

قولتلها خلاص هاكل والدى بقى خلصتوا مرشح كل يوم قلتلة ايوه يا حاج الحاجة بتقول انك عايزنى خير قالى انت عملت ايه انهارده فى الشغل شكلك كان مضايق لما رجعت
قولتلة يا حاج المكان الجديد فية شغل كتير وناس بقى المديره مدام عنيات تحس انها كشرية ومش بتكلم طول الوقت غير فى الشغل والالتزام وكلام كبير تصدقة بس المشكله انه مش بيطبق غير على بعض الناس اللى مثلى عقود لسه معينيين الكبار بقى واخدين حقهم

يعنى فى اتنين معانا فى الاداره بس مش فى الحاسب مثلى حسين وسلامة دول متقدرش تيجى نحيتهم بيجوا على كيفهم ويروحوا على كيفهم وممكن ميجوش وكمان الزملاء يمضولهم

وفى الحاسب فى الانسة منار دى ملتزمة ومركزه فى الشغل وبتقفل على الناس وتحاول تطبق القانون وعايزه الناس تلتزم وتشتغل وكدا يعنى وطبعا الكل مش طايقها لانها جد مش بتاعه عك واستاذ ممدوح اللى اغلب الوقت ساكت يخرج يصلى ويجى يقعد ملوش دعوه باللى بيحصل يعمل شغله وبس ده راجل الناس كلها بتحبة او مش حاسة بوجوده ماشى بنظرية دع الخلق للخالق واستاذ نبيل ده بقى اسم مش على مسمى خالص لانة بيحب يقوم الناس على بعضها وفاكر نفسة مدير وكل شويه بموقف شكل تحس انه فاضى من جوه وعامل فاهم بحس انه مسطول اغلب الوقت وتصرفاته مش طبيعية والانسة موهجة دى بقى رقيقة ومدلعه خالص وعامله فيها فيرجينيا طول الوقت بتمشى امورها بالكلام المزوق ومقضياها ما اصل الناس دى كلها لها ظهر انا بقى ظهرى الحاج صلاح موظف غلبان ذينا وخرج معاش

تعرف يا حاج انا فى المخزن كنت بنام مش بعمل شئ بس كنت حاسس فية مساواه انا حسيت النهارده بس ان البلد دى لازم يكون لك ظهر فيها لانها للمحاسيب مش الناس اللى بتشتغل على كل حال متشغلش بالك انا هتعامل بقى ذى ما تيجى ادعيلى بس انت .... قالى ربنا يصلح لك الحال يا ابنى ربنا يوفقك فى عملك طب ما ترجع المخزن وتشوف جنب عملك فى الوزاره شغل تانى يساعدك تكون نفسك  هو قال تكون نفسك دى وانا قعدت اضحك

بص يا والدى انت متصور انى هقدر اجيب شقة وعربية واتجوز وكدا يعنى ذى باقى الخلق انت فاهم الزمن اللى احنا فية غلط

انا بقبض 400 جنية ولو فرضنا فى حوافز وحاجات كدا هكمل كام 800مثلا 1000 لا اعتقد انى ممكن اعمل بيهم شئ دول يا دوب المواصلات واحاول اجيب قميص كل شهر ولا بنطلون ولا حذاء عشان اروح بيهم الشغل

سيبها على الله يا حاج بلاش انكد عليك ده الكشرى نعمة واللى يكرهه يموت م الجوع

انا هلبس وانزل بس يارب اشوف البس على ضوء الشموع دى قالى احمد ربنا ده اخوك بيصوت عنده امتحان بكره ومش شايف يذاكر ومش عارف يعمل ايه حتى الشارع ظلمة مش هيقدر ينزل يقعد على قهوه ولا تحت عمود نور يكمل مذاكره قولتلى طيب يا حاج منجلكش فى حاجة وحشة الحمدلله انزل انا بقى

دخلت لبست على ضوء الشموع ونزلت اشوف اصدقاء السوء ههههههه عشان اقولهم نشره الاخبار واول يوم عمل بالوازاره لدى شعور وانا بقول بالوزاره كانى ماسك الوزاره ههههه

ليست هناك تعليقات:

إرسال تعليق